عبد الكريم القصاب
ولو کل الگلوب اسرار
ولو کل الدروب اگصار
ولو کلشی،
ورغم کلشی،
حاول تحب کل الناس
بس لاتعتمد عالناس
اصدور الناس ظلمة غار
ناس اسرار
یجوز ابعد انسان یصیرلک شریان
ویجوز اقرب صدیق یصیرلک جزار
ناس اسرار
ناس اسرار
لاتمشي بدرب مدیوس
های ادروب تعبانه،علیها آثار
سوّيلک درب تنشاف بی وتشوف
درب تشتعل بیه شمعة فرح للناس
بس لاتعتمد عالناس
سوّيلک درب تلگه علیه نفسک…
…..سفینه صاریه وبحار
انت یجوز تلگه النار بالجنه
نعم،
ویجوز تلگه الجنه وسط النار
المهم انته الذی تختار
المهم لاتنسه حب الناس
بس لاتعتمد عالناس
اعزف علی العود ابوتر من جمار
اکتب عالنجوم ابلؤلؤة محار
اکسر قیدک ابأيدک
گبل مایعتگ وترهم علی الزنجار
احفر گبرک بأیدک
یمکن باچر امن اتموت
ماتلگه ولاحفار
