محمد الاعرجي
من تخلص اجازه والتحق تبجين
وعليج دموع عينج ماتخلي خدود
تعطليني بوداع وبالي مو وياج
اهد ايدج واكلج ارد أوفي وعود
واذا الزملي واجب قلم متلزمين
قراية واجبج تكضيها يمته تعود
حتى بجيتي تطشين طاسة ماي
ضحكتج بالملاكه ترجع المفقود
عاشك والحرب ماغيرتلي اطباع
واني بصحره امشي وماكو يمي ورود
رسمتج فوك ساتر والتقيت وياج
ومارسنه العشك وي ريحة البارود
وخفت يلاح رسمج بالهجوم الصار
غطيته بدرع من سير الهادود
ولأن يمي اعتبرتج والبنادق هاي
أحس من ارمي بيها كبالج اعزف عود
سحبت ارواحهم لمن سحبت أقسام
رغم جان العتاد أبين أدي محدود
طبع بيه اليحب يستعرض من ايصول
كدام اليحبها يعارك بكل زود
بلمة صاحباتج بية تتباهين
من يهد حبيبي يساوي عشر جنود
خوفج والقلق ودموع تالي الليل
ودعائج ل الله يكسر خاطر المكرود
نامي بضحكتج محتاج أركز حيل
العدو كبالي ودمعتج وكفتني ردود
انه اليلبس بدلتي يطيب لو مشلول
كدما عفتي بيها شجم علك معكود
