ايهاب المالكي
اوكف الموصل الي ماخذها وين؟
الكصب ما يرضى تكطع سنبلة
روح لابن سعود كلة العب بعيد
ولا يمد ايده بعد عالمو اله
اتخسة ما محتاجة عفة قندهار
الموصل من اول صباهة مشيلة
خاف كلولك مجاهد قشمروك
سوو بعقلك الما تتخيلة
السني والشيعي شجنو تطلبله ثار
والمسيحي شسوة تفتي بمقتله؟
يا مفرق ما تسد لا والحسين
الزعل يومين ما نتحملة
ما مصدك شوفنة بوكت الصلاة
مجتف اليمي وادية مسبلة
يا غبي اسرائيل عدهم شغلوك
انت وامثالك حمير المرحلة
بدلولك ،ورقولك، سلحوك؟؟
مطمأنين بركبتك سلسله
روح رجعها لحيتك عاليهود
تبين اللحية اذا مستعملة
خاف ما تعرفني روح اسأل ابوك
فكرة عن صولاتي يعرف من هلة
جنت اذا بالنوم امر بعيونة طيف
يكعد من النوم يقرة البسملة
اني اذكره بخيبر الما بيها باب
وشردت الخيل وبقايا الراجلة
انه الاول وانت من قائمة اخير
وانه ماضيك اعرفه بأكمله
الموت يعصرني نعم مو حتى اموت
حتى يشتم بية عطر المرجلة
جايني برجلك صدك؟؟ لا اني اجيك
شرك الجبته اريد استقبله
عندي ضربة من ابو فاضل من زمآآن
كالي انطيهة لكرايب حرملة
انه الانشد بالصلح راية خضار
وانه الي يسموني راعي الاولة
انه المحجب القنابل بالضلوع
وكامت تسميني خوية القنبلة
من ثرت صاحت ملائكة السماء
الضاهر اهل الارض عدهم مشكلة
تاخذ الموصل أفـه وانه ابن ابوي
من ارد خالي شكل لكربله
اداينتلك قارعه يوم الكتاب
الله ما يبخل علية بمسألة
كفتك؟ كفت اذا لا هم اروح
ارفع جفوفي واجيب الزلزلة
