احمد الصالحي

اشمن ريحتك لاتمر عكس الريح
يالمنكب اعرفك من كفه انكابك
بسك تستفزني وتدري كلش زين
اذا صارت صدك بجروحي اعض نابك
علمني الوكت لو ما لكيت اضماد
اشد جرح بجرح وطلع من الموضوع
بعد ما كو دمع وبجي علياهو الجان
ماقلد الحجر بس والله ماكو دموع
ادورك وين ادور بيك لو بحشاي
من حر الدروب خدودي كام تموع
دورتك دوارت ام لبنهه الضاع
اشوف بعينهه الصحراء كلهه فروع
الف موته اموت وما ارد الراح
ولا امشي بدرب ادري اني بي مكطوع
ومو عيب منموتن حته ما طخ راس
العيب منعيش براس ما مرفوع
وعلي من جنت تحجي بين الد اعداي
اغض السمع عنك مااريد اسمع
تره كلش اسمعك لا تروح ابعيد
وعلي صوت الشمس اسمعهه من تطلع
بس الصوج بيه الوزن مامضبوط
مادكيت رجلي بعتبة المطلع
هيه من البدايه الطكه باول حيل
العيون الحمر من تالي ماتنفع
لو اني بمكانك جا شلعت الباب
وما ردلك بعد من اعرف اتكطع
اعذرك ماتحس هل ما اشوف الباب
لو عدك احساس امن السكف تطلع