عبد الوهاب الحمداني

سولفني اعله كل موسم
 گلايد عايزة احچاية
و علگني اعله جيد الليل
نجمة أتبوگ الولاية
دلّيني النشد معذور
من اشتم ابگلبك سر
و اشربني  الوكت فنجان
 ما يسگيك غير المر
سواليفك ضحك عميان
 من يلگولهم نجمة
او يشرون العرف بالروح
بلكي ايبيعهم چلمة
يبو العفّة الدمع مريود
من يضحك ابگلبك دم
و لو خضّر رمح لليل
 صعبة إعله النجم يلتم
و لا تهتم …
طواري الماي من اتموت
لابد ما جرف يسلم
لابد ما يعرّس طيف
واظنون الحبيبة اترافگ المبسم
يبو إحچايات سمرة
 اشما جزاها الريل تتولّم
يا شفّة درب تعبان
 ينشدني إعله خصر الماي
وإيگلّي : اللبس شمسين
ما يرتوي ابحفنة إفياي
و انت إوياي …
مبحر والشراع اجنون
والضفّة ابكبر عينك
يمغرور إبعفى العشرين
 لابد ما يمر خطّار يشرب گهوة إسنينك
رفيج الدم ، شجاك
او طاوعيت الماي ؟!
 وانت ابكل گلب مزروعة الك چيلة
مهو الينزع هدم عگله
يشوف الخارمة اكحيلة !!!
او يلگه الوادم ابلا لون
 من يشرب كحل ليله
او شسويله ؟!
ترا المصيوب لو باگوا
حلال اهله يمد روحه
اعله گد حيله
يبو اخديدات ما منهن ،
 يهنياله البغيمة شوفهن يحضه
دخليني اعله بيبانك غصن فضّة
او ظلع بلور من يشتد
ابروحك غيض حدر إسوالفك رِضّه
طبع روحي عزيزة
ابحفنة إحچايات ما ترضه