حيدر الربيعي
الهوة .. مد ايده يتمناك ترجع ..
حتى يخلص من شهكتي
الناس رادت فرصة تتنفس هوة الله
حيل مختنكه بحسرتي …..
الليل صار اعمه بغيابك
طلك الكمره وخذلني
وطفه النجوم بسهرتي
وهاك اخذ من عندي واهس …
بعدك منصفن على الجاهل اكبره !!
شيبت ناس بصفتني
جانت سنينك صحاري وفرح يابس
وجنت قبلة امنياتك
جيت تتنخة بحضرتي
الشماته سنين يدعونك تعوفة
بكاعهم عاكول اصفر
حيل غارو من وفرتي
رحت واستسقاء صليت بارضهم
وانه جنت وياك رب..
واستجابتلك دمعتي
وانت نقطة انطلاقي
وجنت راسملك نهاية
والمشه بروحه القطار
شلون يرجع للبدايه ؟؟
( يلي كافل امنياتي ادريك مو عباس انته )
ومن البدايه …
( جيتك بروحي مشاعر والله ماشايفهن احد )
ليش تاخذهن سبايه …
وانه جنت وياك ايه …
ايه بس للاسف انجيلك مزيف
شبهتلي بروح شاعــر
يل عفتني شفايفك خدرانه بوس
وانه تخدر عل جكاير
البياض البيك مو معناه ترافة
الجفن هم ابيض ويسكن مكابر
وانه من عينك عرفتك ..
حيل نشزت بنظرتك
والفرق مابينك وبيني جبير ….
انت ابن الشربتك ( مدري شنهي )من الصبح
وانه ابن الشيله ذيج الفاطمتني اعله الملح
يل مشيت وعايف بروحي جرح
وانه ميهمني الجرح ….
المساحي هواي تفرح من تدوس متونه جدام الفلح
