منتظر الشرع
عله عيوني ينز الليل اذا تغيبين
وأفز بلا حلم مرعوب اذا اجيتي
أدور بأثر جدمج بلكي خطوة الگاج
وين الله وأشوفج بالصدگ ريتي
الله وياك سالم حارسك جبريل
وغير الهذن بذني هواي خليتي
تلميني وتطشريني اعله گد الشوف
غير العشگ يمج ماخذت نيتي
تمنيتج واجيتج واني أعطش شوگ
وبين شفايفج تطشر امنيتي
بحلمي ومكتفي واتقنع بملگاج
بس بواقعج بالبعد هميتي
اشمج ريحت أمي واهس العرسان
يالبيه الف معشوگ طشيتي
يالرحتي وبقيتي بخاطري المكسور
صفنه وعشگ بيه براسي ربيتي
تمنيت عله طولج حظني افصله فصال
واتيه بزندج وملگاج تاليتي
يهمي وراحتي علميني حتى أنساج
قربچ والبعد أثر بعافيتي
يخنگني العشگ وأتنفس من أشتاگ
يمي وما أمد شوفي عله هاويتي
أحسده الشال گلبچ ماعرف يشتاگ
لو أنت بمكاني أشكال سويتي
اتناقض وأعيش الضجه بس بسكوت
وارفعنج علم يعثر بساريتي
ماسهرانه أعذرج مالفاج الليل
وما متخوصر بالج طرف صيتي
لا هميتي بيه بواهس اليهواج
ولا انت ابتعدتي ولنت حبيتي
