باسم الخاقاني
بالغربة گبر بردان
وشباج البخور بعيد ..
بالغربة البخور اليلتفت معذور
بعيون الوطن دخان
بالغربة الوطن بردان
بالغربة الوطن دفان
مثلوم الشمع ليله ..وحن گلب الورد للمي
الدرب مديون جدم ابيض
شيراضي الشمس والفي
عذر مامش..!
بحلاة الله الغريب اليختلي بروحه
لجن كون الوطن مرتاح .
بحلاة السهر كون العين تتلفلف كحل سمرة
لجن ريت الفجر مفتاح
جم باب اعله جفك تاب ؟
جم ليل اعلة صدرك ذاب ؟
تطش الغربة عالماشين ..من تجزيك دگة باب
شمل يارسول الناس اغاني الناس مثلومة
شيب الغربة مايرحم ..وثوبك ياشمع كبران
وناعور الضوه مبديك
بيمن يغبش البستان
گالوا تطهر الدنيا من يضحك مطر نيسان
وگالوا تضحك عيونك ماگالوا يموت الماي
ودي مجاورك ياماي
هم عندك حزن جيران ؟
يا أول ضريح أسمر
يالگلبك مذهب ناس
عرفتك شذرة ..شذرة .. وتضم حزنك غاد
وتعبر صوب المعيدين
لجن جوه الگناطر ما صرت گمرة
وعرفتك من جنت جمار وأغانيك غطة السمرة
وعرفتك من خذوا ثوبك لاساميهم …
.وماغنيت أساميهم
وگالولك الثورة تريد ضلنه اشراع
گلت انا الشمس
وحجايتي الثورة
