احمد الغزي

الدنيا ليل…الدنيا ليل…
وحيرتي وصفنة لهيبي
نجمة مجروحه بسماي
تلصف بنص طيفك الشفته سمه!!
وداعتك بعدك جحيل
 بروحي يالتنكَط جمر
الدنيا ليل
وعرضن عيونك ضوه كَدام شوفي؟؟
ولمعن رسومك حمر
ليل حار؟؟ وغيمه دخان الهموم
الصعدن بحسرة ضواك
شمة الخندوك تكتل!!
 وشوكَي لعيونك مسافة؟
وروحي طير
ترفرف بشمة هواك
الضكَته أفيييش شحلاتك من اشمك!!!
الدنيا ليل..
وجفني مخنوكَ ويريدك
تندهه الغافين مثلك
انت غافي وسارح براحة حنينك!!
وآنه سهران واكَول الله يعينك
آنه مادخن جكَاير!
آنه ادخن حيرتي
وصفنة حسرتي من هواك!!
ويصعد الدخان ويمر بجروحي
وينتهي بآخر دمعتي
الدنيا ليل..
وآنه ضايع بالسوالف
من يمطرن شوك منك
الكَاع حظ..والموت كظ..
وخايف تصير المنية ومااشوفك…
الجرعة سم من القوافي الغافيه
وتكتب حروفك…
الليل كشخة؟؟متاني طيفك
من يمر ويصير عيد
الدنيا مو حلوة ابد من دون ليل!؟
مثل واهس غربة يتفشل خلكها
من تظل بلايه حيل…
حارس الليل انهضم من شاف ليلي
وحلف مايفتر بعد بفروع جرحي
شوكَي الك شوك الفراشة
الطايرة وكلش حنينة
أدور اعله فراشها
وتنام شبكَة اعله الورد!!
الدنيا ليل…
وخلصَن كل السوالف
ونار (حر) حارت جفوفي
من الصفك ورث لحمهن؟؟
ليل باهت والخدود
انكسر واهسهن دمع واشتد حزنهن؟؟
الليل وحشة
ودنيتي وليلي الطويل
اتشابكَن سكته ويغنن
الدنيا ليل..الدنيا ليل..
وهاي جلماتي الاخيرة
وبعد ما بياش حيل