رائد الفريجي
علي بجتاف عينك تغفه الايتام
شايلهم نظر يم خطوة غروب
تمر بعيونهم ويخضر الشوف
وجه كل والد بشباج الدروب
على متون الارض خطواتك اجبال
ولكن بيد سائل ياعلي تذوب
تمر وبظل خيالك تمشي الايتام
وتكوف من تمر بالمعركه كلوب
علي بدرب الركاب جدامك سيوف
تنكت عالجثث بتلال الذنوب
علي جلد الحرب بيك تنرس خوف
لحد ما فصلتله بيمنتك ثوب
اعتبار الفاطمه من دكت الباب
كسرت باب خيبر هيبة البوب
غريبه افكاري يمك وانتجه الليل
عليهه وكل جدم بالليل مطلوب
اكبالك فرعت بالكعبه حيطان
ميانه وجي ركن عالبيت محسوب
اسد وبين حظنك تغفه الطيور
وفضل بالغار ردتلك حمامه
بفراش واحد وباليل وبغار
المحمد ياعلي جنت السلامه
متودعك الزهرة بمعركة وموت
لجنه توادعك يم اليتامه
حقيقة بنص حلم عنوانك يصير
الورد والسيف صار لك علامه
فقير يجدي صوتك حتى الاذان
كاعد ياعلي باب القيامه
علي شكد يستحي من كلشي مخلوق
كلشي بحيدرة تلكه احترامه
احتراما للشمس مو قصة ايمام
علي الخاطره ظل لابس عمامه
الغريبه بلاغريبه بحيدرة تعيش
عزرائيل تلكاه بالسلامه
علي زارع بجفه عيون الايتام
لذالك ما حصد عضت ندامه
علي بشباج عرشك تنتجي هموم
لوحيد تزيلهن وبلا ملامه
دموع اطوف يمك تشتهي اجفوف
ترسم فوك خطوته ابتسامه
