سلوان المحمداوي

الهوى يرتاح لو سير على اجتافك
ولو تعبان
الضوه ايمر جفنك امدنك اذا نعسان
وانت أول وجه بييه النهار احتار
وانت اترف فقير ايشبع الجوعان
يوجه الله العمر خلصان
وآني امنيلي اليرضيك
وضيم اذنوبي خايف يوصله الشيطان
بكلبي النيه اصفيهه
ويوسوس صدري واتنفس ذنب سهران
بدرب ايامي مزروعات
 نفاق وذمه اعديهن
واوصل نقطة الحرمان
وآني إنسان ……
صاحبت الذنوب المالهن داعي
مشيت بسفر موتي وجان
غيبة وادمي امتاعي
وأنه ابحر بالسفينه إبهيمه
بس من ماي
وعصياني الرذيل انرسم بإشراعي
حرت مابين ياهو اكبر
ذنب ابليس لو ذنبي
لحد ما ضيعت كاعي
يحيدر وآني حيلي امزاعل اذراعي
يحيدر والحرام ابراسي ظل يدور
وأنه شايل خلك راعي
دخيلك مني .. بيه ابليس ظل صافن
نويت استشهد وجف والدي المتعوب
يرفض لحظة اوداعي
وأنه ابكلشي انرفض طماع
ابلاش الجنه ادري بهاي
 وجهنم للبشر تنباع
واشريهه
كبال الناس اريد ارثيك
بلكت انمدح وانحسب عالابداع
واوصف طبرتك والعوز واﻻيتام
واكلهم لون واحد جاع
حيدر يعتنيله ابليل
او بالاحرى دز جبريل
واكلهم عن ذكر فضلك
على التوراة واﻻنجيل
واكلهم من تجي الساعه
علي بلمحه يرجع الميل
وأنه كاطع صلاتي
وصومي مامقبول
يحيدر .. مو بدت دنياي بية اتميل
بمعزت زينب اشفعلي ..
وانت اعرف وتدري بمعصياتي اكبار
مو مليت ….
محد حاس بيه وحاس بيع ابليس
واسمع صوت
من حلك التراب يصيح ما حنيت
تعال ونام .. كافي من الحياة
اشحصلت شجنيت
تعال ومنكر امتانيك ..
مثل ما للتحبهه اشكم عمر تانيت
تعال اغسل وجه ذنبك
وضوك الموت
خايف ليش وانت تكول
من هذا العمر مليت
تعال بصف امامك .. حاجزيلك بيت
سكت فجأه .. وأنه ارتاحيت
ورجع ويكلي ماحنيت
سديت اذني .. وإتأنيت
كتله آسف ..
الموت بكيف ربنه
 ومو بكيف الغير
وانت اتراب
خلقتك بالقصيده وعشت بالابيات
وعليه استفحلت ياصوت واتماديت
صيح لغير واحد .. آني كلي اذنوب
اريد امحيهن بإحساسي ﻻهل البيت