عباس الغراوي

أرتفع صوت المنارة بكل درب مخنوگ .
لمّة ناس … بين عيون مطشرة
بعد ركعة ويون لفراگك المحراب
ويكشف الظلام الليل عن فجرة
ذمّة بختلتك ياخنجر أحچي وياه …
گلّة أيتام … يم الباب منتظرة
علي بدارك فقير متاني خبزة يريد
سمع بيك من أمس عزليتله الفطرة
يالمعلم السنابل من يمر جوعان ..
الراس يدگ خجل ووجوهن صفره
من توگف الحاجة تدور رحة البيت !!
ويجد حلّة السؤال وينفرج صبره
ماتيبس خجل بچفوف سايل ليك !
مثل گصتك خبزتك شايلة الگطرة
أنترس جيب الخلافة من اهد ماطبروك
بعدك والحكم … مايرتفع قدره
خر سگف اليتامى وفاض بيت المال !
الدلال على البعض والعوز للكثرة
گصد ليك الكرم ثوب بطفل معتاز
كفت عازته وزادت على الگدرة …
أثر بصمة سجودك ياعلي بكل گاع
وتعب مسحاك حط بكل شبر ذكره …
تعتگ صورتك بس چتفي ماينساك
شما أصدن وشوفك للنعش حضرة
علي بسنين حكمك أسّست قانون
يختل بيه نظام العالم بأسرة ….
وصّيت الحسن مو ثار ياخذ ليك
يقيناً ياعلي وصيته بالفقرة !!