احمد المرشدي
حلاتك تندل المدفون
والشيب وطواريه !
وتهوه المطر والسبّاح
والطين ومحاجيه ..
هذن بيه !
يالبعيونك اندليت
وبعتبتك شاتل عازتي وسري !
يالماگلت يالتدري؟
النهر يقره العطش ومغامز الگيعان
مو بطران من يجري …
يالمجفي تره بجفاك
عمري مخلص تلگط !
يطير العافية
بروحي تعال وحط !
يغيمة راحتي
لاتزخ بس نــگط …
كون تعيشني ؟
وداعة ملح طرواك !!
هيل يطش بالولاية …
وادعيلك بكل غروب
بجناحات فختاية ..
شوگك مو جگاره وكاس
أذكرك عالمصلايه !!
ولك ياهيبتي
ياتجوتي يدواي ؟
گضه عمري اعله بابك سدره
منهوبه ثمر وفياي ..
نهر ذابل
صفگ جرف بجرف واحتار
ياناعور باگ الماي ؟
جايمته المحطه يارباة الريل ؟
جا يمته اشتعل طيف
اعله بالك عود ؟
واتمدد نفس بردان
مايشتهي يلمني الناي …
وكـــــ يازين
أريدك تعتنيني مسابگ ويه الظل !!
أريدك تشهگ وتشرب
ملامح وجهي من أجبل ..
مو تدريني اشوف الليل
سرداب امن اضل وحدي !
وازغر والزم البيبان
ويطگ نبع يم خدي …
واغط بين التتن وال آه
واسود لون دمي يصير
واتسافر أحلامي البيض
سفر ليره التوالي البير !!
يجمارة سنيني وياتعب مغزل !
يم شباجي مدري شجم ربيع انذلْ !
بيه هواي ..
كسرة خاطر
وهم
وحزن ما جَلْ !
صرت من أقره دمعه بأي جفن للناس
اغص وثيابي تتبلل ….
عاشرني ..
والعشره تصيب مره ومره لا تخطي !
استغلني ..
بروحي بيدر شوگ
لا ماخذ ولا منطي !
تره ابن آدم الگلبه يجيس
اذا صحله ولف يسطي ..
وانه مشگبن هلاهل عيد
افوتك والله لا تبطي
