عزيز عسكر 

غربة الوطن مر بالنواطير…
(ليل وگمر)
برد الحزن غنه التصاوير…
جسنة الليالي بغربتك گمره وعرس..
ودينه طولك للسهر صوغة من امس..
نذكرك وكت المواويل.
نشتاگلك لوجاسنة اليل.
اخ العمر
ثاري العمر غث النواعير…
(جف النهر)
شال النهر ونطه البساتين…
حنه وشمع
گبل الدمع ضحك الروازين…
ماندري عمرك ينطفي بثوب السفر..
شفناك شهگة عافيه بروج انكسر..
لوتدري بينه شگد بجيناك.
يمكن ترد وتجيبنة وياك
(يمكن ترد)
بس الورد عاف السنادين…
(طيف الصبح)
روجة حزن تتعدى لليل..
گلب الشعب
فزة خصر دم المجاتيل..
بعيونه اتنام الرسايل على المطر..
بعيونه يغفه التعب فوگ الصور..
بلكت تمر خمرة بحضن كاس..
ونسولفك للعيد والناس..
(بلكت تمر)
ماظل صبر ومخلص الحيل…
(طول الصدى)
بجفن الندى يدور والغياب…
(حزن الفجر)
بجه العمر والمامش احباب…
هنيالنه اتنانيك غبشه من الوطن..
هنيالك اعله عيونه المنك بجن..
شيصير لوضحكة فلاليح..
گبل الهلا اعله شفافنه اطيح..
(نجمه العصر)
فرحة عطر والواهس اعتاب…
(خلگ الشته)
ارموش الجفه وتراب نهران…
(لاح الغنه)
وطاح الغنه اعله الگاع بردان…
من ليل اصابيعك مشه اجنازة الندم..
من سفرة القداح صوتين الجم..
كون المشه ويه الروح نلكاه..
ونزيحه خافن توجعه الاه..
(نبجي اشكثر)
وانت اشكثر بعيونه انسان….