ركزان الشيباني

كلشي بعد المتعة باطل مايجوز !
علموني..
لو تضيج الدنيا تفرج
من نگول الله كريم
( يمة من الباب للكوسر فرج)
ومن تخنگك عبرة العوز
وتجوع اقرة قرآن وتنخّة بيا مجير..
علموني
 افرش السجادة خمسة
ومن المها… اشبع اسبعطعش مرة
وكل سجود بقدرة الله
اوية الدعة يخضّر رغيف
وماامد ايدي ..وأعف نفسي وأردها
 لو نوَتْ زلة رصيف
علموني.. ياااحرام.. استغفر الله
مايجوز.. مايصير
وكلشي غير التقوة باطل
العلموني ماشفتهم
(باليجوز.. بالحلال.. باليصير)
فرزنت عدهم الباطل
وكلشي وَيّة (اللوفة)يرهم.. ياقدير !!
اليجوز شكثر عدهم ماكو عدهم مايصير
احنة باسم الدين حللنة النريدة
دكة الماتعجب تخرّب شغلنة.
 تصير فتوتها حرام
ويا سلاااام
وكبرت الميجوز عندي وزْهَرَتْ عيب وحرام
وزغرت عيوني امن اشوف
الابيض تنفس ظلام
وياسلام
علموني.. الحب حرام
المرأة عورة.. صوتها وخلخالهة
وجرّة كحلها وطولها وديرم الشفّة وياسلام
ودگة بوكت الحزن الدنية فرصة
وبينّة اتنشّدنة گلولي شحفظتوا
گالوا انتي
غردي انتي ولو مجبورين
نسمع وانتي عورة!
شِلِت ايدي ابالله شاهد
 بس هذني وما طلعت بغير ذني
آني عورة
واليجوز تلاثة كلش
النكاح
الزواج ايحل اذا مثْنى اوثلاثٌ وَرُباعْ
وكلشي بعد المتعة باطل!