علي محمد المواشي / النجف الاشرف
ماموجود
ادورك بالوجوه وبين الحجايات
وامد روحي جسر لمواصل ولايات
واتجه اعله خلك الليل
بلكي الله وترد اردود
ماموجود
كلي بياكتر والكاك
تعبت مابين ادورك
بين ارد وانساك
ناطرتك خلك فلاح
جف صبره اعله خده ارتاح
قصة منجل وشلبات
يلمهن موعد المحصود
ماموجود
يالبكلشي طبعت اثار
صبح لوحة الامس وياك
يشبه ضحكة الجمار
بحسرة وليل
خلصت العمر محبوس
بين الونه والياويل
وحك وداعك لملكاك
مابيه افك ذرعان
وين الكالي روجة حيل
بحلامي ارسمك جاي
واسولفلك سوالف ناي
واكلك بس تعال وياي
ادليك بكلب مخنوك وجف مشكوك
لان بغيبتك جم نوبه سد حلوك
وامد جفي وارده بمستحاة ام بيت
جنت خايف
جنت خايف الوح زلوف
بيهن بس فراش يبات
بكثر ماني اعتنيت زحوف
راحاتي صفن خشنات
من كد ما اجمع حروف
منهن الفت تورات
وخطيت اسمك اعله جلاد
فوك اسمك مؤلف جان
ضل ناقصني بس عنوان
شواوكف ؟دخل اذكر
يمكن اسمه بس لحظات
وبس لحظات
بين الله يرحمه وهسه جان وياي
بين السمجه والصياد فكرة ماي
بين الخيمه والخيال جف وجود
ماموجود
