احمد العقابي/ ميسان
اخنگيني بمعانيج اجيت ارتاح
المغزل بالخنگ يرتاح
واذكريني بكثر مابيج
شوك وموت
سابع غربه اطب بيهه
من احن للناس !
وهذا الحال
من يطلع نعش مفتاح
خصر الباب ماينجاس !!
وهذا البير من يعتك
شقه يكضي العمر صندوك
وانه جلمة بخت وحده
الي جلمه النخل
يوميه عنده عثوك
بسك ياعطش
واعدت ذاك الروج
وبسك ياجرف
اعله نهر واكف طوك
انه رويحة ضريح
وياج دوريني
وﻻ تلكين بي مكفه
وانه ذاك التركتي مااااي
يتمدد وﻻ يغفه
وجع باقي اعله كد الضاع
سمه حمره ويهيد الطير
خنكه ومايمداله اذراع !
ومافهمج!؟
من يمشي بزعل! مرتاح
مافهمه اليروح اشراع
وجع باقي اعله كد الضاع
هنياله البلم مامنحسب عالكاع ؟
اريد هناك يم عطرج
حماماتي كبل تسكر
واريد من الحقيقه وياج اسافر طيف
تاخذيني العمر
كلما كبر يكصر؟
اطيحن طيحتك يا ليل وبلا صوت
اغث الناس من احجي
اليه بكل مكان اردان
وراج الناس محد يفهم اعيوني
وهيه اشتاخذ اعيوني!
اكرهه اليخنك التابوت
هوه شياخذ لميت
ارتاحي
سمارج مغرب اوﻻيه
يشامه بخد الوﻻيه
هذا لمااي من يرتاح
اعله طول النهر يتمدد امرايه!
