ميلاد/ بغداد
وين ماصحلي دمع امشيله عين
وامشي دخان لحلگ كلمن سهر
من كثر طعناتي ماظلي قميص
وحتى يمكن بعد ماظلي ظهر
شبچت الصياد يم ظهري نشاز
لو تقيس جروحي ازغرهن شبر
الليل سفره وماخذ الحسره متاع
الشهگه تجوي وصارن سنوني جمر
تاهت سنيني وگضن كلهن سراب
رگضت ايامي ورگض بيه العمر
اباب شفتي تلم عطشها الدنيا ليش
بروحي چنت منين ما باوع نهر
جانت الشجره التموت انطيها روح
وهسه بفيايه علي عز الشجر
بكل كتر بخيالي دم ينگط صفيت
جدمي عمره الما عثر هسه عثر
حته ضحكاتي علي محسوب دين
عيوني غيم وبالدمع عدهن مطر
ليش من دون الخلگ بس انه هيچ
چني ذيچ الطلگت وكضها العسر
خضرت عيني شلب كد ما بچيت
وابابها اشفافي العطش لازم سره
الفرحه نهران و اريد اعبرها عود
اجدامي عدها اطلابه ويه الكنطره
الگصبه دچه من الظهر تگلبها ناي
الوكت حيل بظهري سافر خنجره
