حسين جيجان/ بغداد

يالمذلول كبل ايام
من انسان ربع انسان
اجيت ابابي تتوسل
ودخلت ابنصهم اختاضيت
طلعتك يالترهيت
كتلي بدمي الك مديون
كتلك صار تدلل
هسه استغربت يفلان
تمشي ويه اليذلك جان
تباوعلي بطرف عينك
وكل عقلك تريد انذل
الكمر كلش حلوو من يدور
بس بي نقص هم مرات
نص الشهر باوع زين
يشبه فرت المنجل
بكثر متشوف نفسك زين
تتكبر على اكبر ناس
تبقى بعيني المبهذل
غشيم انت يبن عشرين
تريد الندى ويه الوردات
وكت الصبح يتمشكل
ونفسه الي مشيت وياه
كبلك علي دك الباب
بس ما عاشر اني اخفاف
من الروح اظل اخجل
ونفسه الي مشت وياه
وحك ذلتك انت وياي
عاشك كبلك اشكد ناس
ابد لا انت مو اول
اليذبل ما يرد يعيش
ذبلت كل كرامة البيك
طم نفسك بحضن تراب
بلكي يورد اليذبل
الكصير عقل والثواب
جاي ابراسي يتمندل
المبيوكه كلبه بليل
صاير حارس معدل
اذا مو كدهه يا فلاح
لا تتلمس المنجل
الما جتفله جف انسان
يريد الماي يتسنسل
الماشايف الوردي بيوم
هسه يريد يدلل
الما فاكدله ام وخوان
يضحك على اليتهدل
البروحه قصر من طين
لا يدكرب اعله الماي
والله يصير قصره اوهام
اذا بطرافه يتبلل
يالمعاشر صدر مطروق
توارد بالقصيدة هواي
نفسه الصدر اي مكتوب
بس العجز يتبدل
فتره وداعتك ونشوف
ياهو الخسر ياهو الفاز
ويبين المستقبل