احمد عبادي

صار سنين
 لا ضاحكلي بوجه مرايه
ولا ماطر روحي عله گرنفل
 ولا سير مايي لكل شجره.
صار سنين
 لا لاجم گلبي بناي اسمر
ولا فاتح رازونه الگمره
كلهه ومن گالو ذكرتني
اي ذكرتني
 وتشيمت اعله ارياي شگد بنسايمهه
اي ذكرتني وفطنت گليبي
اعله الغنوه من شفايفهه
وحنة روحي التمت
من كل حايط منسي
وشبگت جفهه.
وجاي امشي بروحي ولاگتني
ولمت عش مسامرنه التم
وجسنه الگمره وحنيناهه بنذر اليحلم
ومشت جفهه اعله الما شابن
واتذكرت النسمه
من تمشط شعر الشط
من جاستني
ورادت تنشدني اعله الجنه؟
 وگلت اليمج
توصفلي دوه لروحي
وحارت گلت باسمج
ويمهه شگد مستحه ماخذني
وهي تگلي شمالك
مبعد يمعيبر خل شطك طرني
واتعاتبنه
وحيل انغثت من كلتلهه
يهلال الما يندل عيده
العاشگ هم شوگه يريده
يحبيبه ووينج هالمده
يحبيبه العاشگ من يحلم
 بايس ولفه تفتح ورده
ومنج لا طارش فززني
 ولا طير يحط
والكاتلني بگلبج يدري
الغيمه التشتاگ البستان
 طروش تنگط
واتدوهن والحسبه تگلي
بس لا جف غيرك يحويهه
واوميلج وانده وبنوحي
ياگطره الشباج ينزلج
طيحي بروحي
وانتي ولاگلتي ولا جيتي
ولا فرود ندهج لعثوگي
ولا شفتج لاجت لميتي
وانه استبطيتج گلت انسه
ومرت بيه هواي سنين
بس هاي الليله ومن بلل
ماي المطره تراب الديره
هوس نشد بروحي وفزت.
ليش استورحتج من مطرت