ياسر الابراهيمي/ الرميثة
مدري ليش
نعيش غربه بسد شمسنه وگاعنه
ومدري ليش
نسافر وبس الدموع متاعنه
ومانبينلهم كسرنه
والهضيمه سوالف العوچيه
تحچي اوجاعنه
يمتى نرجع نحلف بشارة نخلنه
ونرد نتعافه بثمرها
ونرجع لخبزة حطب
شگد غفينه بفي شعرها
ومن تراچيها تناوشنه الرطب
وشحلاته الماي
من يمشي اعله طوله
بهيده لايثني الگصب
اخ يافطرتنه وملوحة امس
واخ ياذيچ المحنه
وياسوالف عينه وذاك الهمس
ضلمت چم گمره بينه
وماغمزنه لأي شمس
وعايشين ..
وضحكه بينه .. ونلچم
ايغرد الدلال حسره
وهيس الضحكه رسم
ونحترگ كل مغربيه
ابخور بس وينه اليشم ؟
وذاك من ذاك الفهمها
النار لو غيمه تنث
ضحكه بوجها
تموت بس ماتفتهم
وناس ماتعرف دربها
وسولفت بينه لعب
مثل فيض الماي من يسطي
وبعدها يصوفر بگاعه الشلب
شتنفع البرده
اعله شباچ الضماير
لو هوى الحاقد يهب
امس فرعنه الوچوه
ومالگيناهم شذر
وبين ابليس بعلگهم
واحنا فرفحنه النذر
وننچفي بخورة حچينه
وچم سفينه انباگت بماي العذر
وچم نهر بيهم غفه
بلذة صدگهم مافرش
وفوگ من سباحنه يغني العطش
السالفه ومابيها ضعنه
ومالگينه احساسنه
ليش نشتم كلشي صافي
ومن تمر خمرة حچيهم
ماعگدنا انفاسنا
حيرة الوادم جبيره ..
اي چبيره ..
وحاله وحده
لو نفرزن نجمه نجمه
بهاي نعرف ناسنا
