الراحل / علي الشباني

روحي تعبت شوگ.. يلطولك حرير
روحي صبيرة ومشه بيها الرملْ شمسين.. وانتَ
انتَ روحي تريد من فيّكْ شِبِرْ
يا ضفيرة ماي مسگي الشوفْ منك..
يلي عينك تنبتْ بدمي ظهرْ
ياحلمْ هايمْ، تُوَديكْ الشمسْ
بربَعْطعش مهرة شگر
روحي شيمه، اتْحّني گذلة سنه اكحيله
.. وحيلْ تركضني سطرْ
زتني بدرَيبك سَنه
أكتبْ رموشك غنه
اشتلني صفصافه أفيّ ترابْ جِدْمَكْ
خذني بعيونك سوالفْ
خذني بگليبك حچي
ولو ثگل ضَيم الليالي
أوگع بخدك بچي
خذني شوفه اتشيمك.. ترسمْ عيوني عله ثوبكْ
بالحنينْ.. وماي وجهي أتحزمكْ
أبچي وجه المستحه بزيجكْ نهرْ
أغسلْ ترابْ الليالي.. ترتوي النيّه الزغيرة
وتغمض أعيونْ السفرْ
يا غصنْ.. يا خَيطْ وَاهِسْ للشَمِسْ
ما جاسْ دِنياكْ العَطَشْ
واركَضْ لطاري سواليفكْ نَهْرْ
يلي طولَكْ غَفْوَة النثيه بتعَبْها..
 بنومْ أصابعها الطويله وبالسَهرْ
أزهي لو تزهي دهرْ
بيّ من ضَيمَكْ دَهَرْ.. ضَيمَكْ دَهَرْ
خِذني يَشْگرْ لا تردْني
صفگة إجناحين خذْني
هناكْ.. لو جاكْ الغوه، وشوْگ اللعِبْ
من جَرفْ نَجْمه بِعيده أرضه تِذبني
خذني گتلك.. تِشْتِهي الدنْيه وَكتها تِردْ لأمسْ
روحي بستانْ العصرْ، وَحشه
 ومشتْ عنه الشَمسْ
مرّ عليها وندّي دَربْ الليلْ.. يالغَرْبي ولكْ
ياسمه عيوني.. يالمرجح ليالي فَلكْ
خذني وي حالي شلكْ
خذني يا.. فدوه لهلك
فدوه لهلك