الحلم دخان
نشاْت النعيمي/ ميسان
عكال المارهم راس الحلم دخان
يالمكفوف نظره بخيط وصلت ليل
ياضحكت رماد تخاوي وجه الكاع
ثلج خصرك شكمطنه بشمسنه يسيل
يالجريت جلمه بطرف شفة الماي
ابن ذاكه الكظاها بخلكه ريحة هيل
النفس مايطب ريتي ودخل محظر خير
العثر بجدامهن من الفهاوه يميل
البس ثوب المطر مغسول ذنبه بخير
الشمر ضحكه وخلك شفجه بجلمتك نيل
الكسر ظهر الغصن يكسر كفه العصفور
الحلم مركب خيالي وبي ضحكته تعيل
الدمع وجفوفي طالن والعمر كصران
العصر مصلوب عيسه المغرب النه انجيل
انكتلك رمل والجثث ماي طيح
وجلد الحرب كزبر من يشمله دخيل
الرسم صوره اعله وجه الطين غارت بي
كاع شمااشم شالت حرورة جيل
الزرع بعيونه صدره بكصته روجه السيف
الحمل كمره بشليله بحظنه ليل يشيل
اليشك صدر الجفن طبع النمل لوجاع
الهوه المرني بغيابك لبس ثوب تراب
الظهر بعيونه وجهي وجهي ظهر يصير
اليهز ضحكه على خصره بعمره ابد ماحاب
ثكيله براسي صوره بعقلي جف بسمار
اغرب روحي بيدي انوب اهزل لحباب
الزرع خطوات جدمه على الدرب بي روح
الخنك بجفوفه شبكه بجفه ريحة باب
الذكر جرحه القديم اعلى الملح مفطوم
الرهم طوله اعلى خنجر وجهه شال انكاب
الغفه بشفة حلكهم جلمه من زفو
الركض شفه بلهفته اعلى العطش جذاب
الرسم كلبه اعلى جذع الشجر هزه فياي
وانه بمكفاي احيل شكد سنين الذاب
انه براسي انزرع طبع المواقف شيب
الورد يجرح حساسي شما تسحكه ذياب
حبيبة امي
انمار قاسم المطيري / بغداد
امي من ترفع اديها
يروح فرحان الملك شايل حچيها
چنة جايب لله صوغة
وكل حرف من عدها تربة
علي جبرائيل صلى
امي لو بوسن جدمها
قبل الله يكلي الله
الكعبة تتوضة ترافة
كون تسمع صوت مخبازتها اذان
يلكة روحة بحضن امي
لو رجف كلب الامان
امي من تنخة ابو فاضل
ابد ماترفع اديها!
ليش اكلها؟
تكلي يمة
بيا وجه ارفع ادية
وابو فاضل مالة ادين
وشي بشيلتها ملامح للسباية
لهل سبب شفت الحمام
يطوفها كل اربعين.
تموت من كسر الخواطر
ولذلك من تعلمني قواعد
جانت توصيني يمة..
كل حرف جر لاتكسرة
بالسجن لو اخط اسمها
ينكلب من الله حضرة..
للوان شيلتها العتيجة
تروح فدوة الف كمرة
وعلك ام الحسن شي غافي بديها
ولذلك من ابوسة انحسب زاير الزهرة
الوردة لمن تعتني امي!!
تفتهم امي لغتها
حبيبة امي.
تكول هارون وي موسى
ومن تروح الوردة عنها
تكلها وديلي سلام لكل خواتج
وردة..وردة
ودي الكل وحدة بوسة
وكون يبرالج ندى الله
وكون تشتمج عروسة
