علي خلف

ضگتني لو بعد عندي الزلم عالضوگ
وصلت الباب بيتك وصلت الفكرة
تعنيتك علي عود انته صير الباب
انه مضوگك علي بالقلعة والسطرة
ما ظل شي بعد باقيلي رمشة كاع
وأرد بچفي ثار الشيلة والفقرة
شنسالك ولك زينب بروحي اتنوح
وبعد نار الخيم بالروح متوجرة
يم باب الخيم جدك الواكف نار
أميز احفادكم من بين الف جمرة
ما عندك وجه يعرك الغيرة غطاي
انه بگصتي ابو فاضل حاطهة الگطرة
تنخاني النده وللورد طالب ثار
وعلي بموت الفلح تتخوصر الشجرة
وحك طبرة علي وجفوف داحي الباب
داعش واليتبعة الليلة ما عذره
تعنيتك وجيت اعدلي كلشي البيك
ولو ما بيه نيته ونطفتك قذرة
الكلمن باعني طينته بخده انطيه
على تراب الوطن ما جامل بشعرة
جبت غترت أبوي احزام موش انگاب
يطيح اجم حرب من انكت الغترة
انه ابن الما صفگ چفه اعله موت اعزاز
انه ابن الما بچة ولا چفة گض خصرة
انه ابن السواتر كشخ بيه الموت
نه ابن الليل بيه اتأمن الگمرة
انه امتاعي النجف لو سافرت للموت
انه ابن الگال (ماخذ عالنجف شمرة)
انه امي ابروحتي اطش جفن مو ماي
وحك شيلتهة امي الحومرت صحرة
على كبر الشهيد اتهلهل ام المات
تذب چكليت فوگة وما تذب حصرة
انه اصيار الحرب راضع فشگ ودموع
ونعاوي امي بعدهة براسي متوزرة
الشهيد العدنة اذا شممتة جرت اقسام
وعلي مرقط يصير الجفن لبگبرة
تعنيتك نصر جبت العلم وياي
بيه واهس علي من حجيلة عالزهرة