عامر عاصي
روحي سلّة خوص
وهمومك جمر
وإشتهيت الليلة أحبك من جديد…
نصير ساگين بجذر
انته، يا فرحة يتيمة
انته طيف
معلّك اعلة ذيال غيمه
وآنه هاوي..
وآنه خاوي
وآنة جاهل باع عمرة ويه التتن
بين الكهاوي
وشيبة شيبة،
كبرن هموم الليالي
وظفرن سنينك ظفر
ومرجحت روحي بكصايب
وبمصايب
وبخلك صبّير، عطشان بثنيتك
ولو،
ماباست شفاف الديم مطرة
ولو،
ماظلّت بعد بالروح كطرة
بس اجيتك
واشتهيت الليله أموت اباب بيتك
آخ مني.. آخ مني
شكد تنيتك
*****
وصبّت هموم الليالي دموع دم
تنزل واعتهه
العين، والدمعة برمشهه
الوالدة الودّعت بتهه
وانته الخضيره، المسج،
والهاشمي العيّد بعيده
فرحة الجاهل ترس عينه
ويدف نبضه بوريده
انتة الولاية الجديدة
الواعدت روحي.. ونستهه
وانته أهلنه
عيونهم هدوة مسية
والفرح بيهن جنح زاهي برفيفه
والسوالف واهليه
أنثرهن بطيّ الكصب
واسمع وهيفه
يازلف كلّش ترف..
حدّ المنية
وآنه ناحل.. وآنه ذابل
وآنه ضيم أسود مثل لون المكاحل
آنه كل كطرة عرك صدر المغازل
وآنه كل عيد أصطبح بدموع جاهل
وانته بسته
ياطعم صاج الشته،
ودورة رغيفه
انته وجه أمي..
التنام متانيه..
ابّاب الصريفه
أو وجهي صورة معلّكه
بحيطان غربة
توجع ضلوعي البسامير وتنيتك
وغطّه وجهي تراب الأيام وتنيتك
وعلّكتني خيوط شوك.. وما نسيتك
آخ مني.. آخ مني
شكد تنيتك
