سيف بيان
لونك غنته الحنطة
وشلت روحك تعب لولاية الضحكة
تراب أسمر
كضيت الحلم شباچ
وأجيت أعله الفجر نعسان
چي بس تنكمش تخدر
چنت من تنشبك تزغر
ظل باوع ..
ظل باوع ..
لذيذ الشوف خيم ع الشعر والناس
وأنت الموت ماخذ
من صلاتك ليل
والدنيا فرح بالكاس
الحزن من ينذكر ينجاس
وهذاك الفي ..
نكع بولايتك جيه
ونسيم المستحه مسافر
خليت الظلام خيوط
من فزعت شمعك نار
والدنيا بدت باچر
المطر فوك الحزن شاعر
يهيبة اللون البكلبك
وكع من يوسف حچاية
من تصعد چفوفك طيف
(بكمر) تتحنه الولاية
ومن ردنه الجرح ينشاف
أجيت بوكت مراية
واليدري عطش!
قمصانك الغنت ع الحيطان
روحك تعشك السفرة
روحك تعشك السمرة
ومن غنوا فرحهم (كاس)
أنتچيت أعله الثلج خمرة
شحلاتك من رحت
بين الكصب كمره
الموت ..
الموت ..
الموت بكل شوارعنه
(صور) ينبت
الحزن من تقره بجروحك
صنم يسكت
