محمد الاعرجي
شقصرت وياك حتى تذلني هيج
بلا زعل طبع اليحب يعاتب
ارد احس عندي وطن يحويني كون
ماردت تنطيني منك راتب
العندة موطن بي يمر دجلة وفرات
محد يكلة اعلة عينك حاجب
عيروني بغرفتي المنك اجار
بلا سكف كالولي ناس تراقب
انقهر وارجع واكلهم احلى هيج
حتى اشوفن باجر الله شكاتب
توزع الخير اليجي بثنين اديك
لليكرهك واليضد والكاذب
ومن اجيتك كتلي ماظل عندي شي
خلصت والناس جاي تكاتب
وانت حقك اني متأخر اجيت
اخر الناس اوصلت ما حاسب
همه من لزمو سره وخيرك خذوه
عالسواتر جنت لازم واجب
