علي ال جعفر
وإذا دارت عليّ دنيا بوضع متدوم
وكت وخلك عندي ومنتظر داسي
گلهم دنگت بس ماوصلت الگاع
وعند الدنگوا ماينحسب راسي
وگلهم بالحچي مااسولف بوچهين
وگلهم من أغيم يمطر احساسي
من شحة علي بالملگه قست الناس
ياهو الجاي شامت ياهو اليواسي
من أعاتبلي بشر اترس عيونه دموع
من بير المشاعر منترس كاسي
ماادور بگعده اتعله فوگ الغير
بروجه اعله الجرف مو هذا مقياسي
حكه انطي وحكه يظل تحت الاضواء
من اتجاهل بشر لاتعتقد ناسي
أندله الشمر وأعرف اشسوه هناك
واعرف حسيني ياهو وياهو عباسي
وادري ايامك تبعثرن ظلمه بليل
وادري بقاربك مو عالجرف راسي
انه الضحكه الغميجه بوچه الحديثات
وبخبزة الفقره يدك جذر ساسي
ترف وأشبه الماي الحد الاستنساخ
ومن أغتاض أبين عالصخر قاسي
موش بجذع نخله يطبره ياهو الچان
بالجلمود الاخشن جربت فاسي
شميت الهوه كسرة خشم للموت
مازاحمت ريه بشمة انفاسي
ما انام وعليه اثنين زعلانين
وماانسالي واحد من اعد ناسي
متيقن كلامي اعله المقابل سيف
وعالشك بالسوالف مات وهواسي
هوسه بروحي مشتهيه بجزيره تموت
شوگت ماحاول اهده يدگن اجراسي
