فراس السراي
على ملكاك جنت اتوضه لو جيت
وتصليلك لهفتي بشوك وايمان
تقشمرني ابأذان تكلي وفيت
حي اعلة الوداع ايصيح الاذان
اسامح من ترد وانساهة الجروح
تصد وجهك علي من زلة السان
الك مخصوص كاتب هاي الابيات
وكل بيت التسمعة صرخة انسان
اذا رسام يرسم لوحة ادموع
ما تنشف لأنهة ادموع فنان
مثل الحب صرت وياك مجنون
يدلوني بطريقي ناس عميان
تشتل ملحك اعلة اجروحي شتريد
ولك عمرة الجرح ما يطك بستان
يالغافي بصفنتي رمز ضليت
مثل خاتم غفة بجفوف عرسان
عندك ذائقة من دون هالناس
لجن مو بالشعر ذواق هجران
تعال اسنين يوسف سكنن العين
كبل جانن اعيون وهسة نيشان
