بهاء الكاظمي

يضحك من نمر حفاي درب الطين
نمشي بلادرب! والخطوة شمرة عين
اجة الليل وغفينه.. ونام بينه النوم
وتلاكينه بحلم,,واثنينه متيهين
لاصبحية تضوي,,ولا شمس بالروح
ظلمة,,ومن بطرها تعثر الماشين
تودعني ب(هلا) وخدي انترس بوسات
ماجنة انتوادع…جنة متلاكين
مهجورة بغيابك والغراب يدور
ويفزع الشماته وينده الواشين
غركنه..والسفينه مسيسه فوك الماي
السفينه بلاكسر…بس احنه مكسورين
حشمت البواجي..وفزعن لطرواك
واول ماذكرتك غركن الصوبين
ولك يازين
ولك يازين ليش تروح؟؟
شهكتك نسمة نسمة وجنحت بالروح
وكمت تطير وتعلي
قوة جناحك عليه وهسه جاي تروح؟؟
طرت بس حوبتي توازيك…
اول ماطرت..مطرت سماك جروح
ومن شفتك
تريد تريح جناحك
لجلك ياترف سويت كلبي سطوح
وترد اردود تتعذر..
ماي انت…وتجيني تريد شربة ماي
وانه بية العطش..فوك العطش خضر
مثل غيمة براري استطمعت بالكاع
نزلت عالتراب تلم نزيز البر
وتحايلني وتكلي شبيدي عالمعبر
وانت الماي والمشحوف والبلام والمعبر..
ومن بعيد..
اذبن روحي عالمرسى
واشوفن كلبي مثل الطير…وانت بشعرك تحبسه
افلت كلبي من شعرك يريد يطير
وبطرف الظفيرة المايله تفرسه
وتكعدني بحضرتك ليل
وتحاجيني بغزل بعيونك الخرسه
وتمايلني بترافة وركة النعناع
وتحضنني واحس كلوبنه منعسه
انوم كلبي يم كلبك
واوصي بكلبي لاينبض
اخاف يفززك حسه
ولك جملني بس يومين واتلطف
اول مارحت..
ماي الشفايف جف
ومن شفتك تمد جفك تودعني
صرت كلي عله مودك جف
اكض جفك واحسك تسري بعروكي
وتخالطني وتضل عله الكلب تلتف
وييييييييين تريد؟؟؟؟؟؟
تريد تشوفلك خيال؟؟
انه الخيال
جبتها وياك صف بصف
واضن كلفه وصعب والله تتوصف
من اشوفك تنزل المركاض
انت وياه مهره مأصلة وخيالها مهتلف
صرت بالبال حسبة بال
حسبة مهرة اصيلة ومالكت خيال
يسرجها ويسابكها ويه هبت الريح
اذا طر السلف.كون السلف ينشال
واحلم….
احلم جني انه الخيال
وبجفي الرسن واتمايل ويه الريح
واخرمش بالدرب وسحك ضلوع الكاع
وبحافر مهرتي الكاع..نصها تطيح
ويتلاشى الحلم سكته بتوالي الليل
لامهرتي يمي,,,ولابديه الحيل
افز…والكة الدرب ليغاد
وانه لوحدي وكدامي تسري الخيل