ضياء عامر

بين وجوه ومراية
يتبدة الكمر راية
واشوفن كلشي .بس مااشوف
خطوة وحلم وحجاية
اشوف دروب تتعلثم
واشوف الناس غير الناس
 من الطيبة تتلثم
واشوف الحيرة تطلب دم
واشوف سنين مابين الحياة
والموت تنزف هم
ولا جني الكبل مهيوب
مني الناس تتعلم
من اسولف وي المرايات
اعاتب كل تجاعيدي
واسأل عالحبيب الراح
 مني وراح من ايدي
يحبيب.شجنيت وياك
اركض والعمر منجل
يحبيب .جزاني الشوك
واتاني بواهس المرسل
يحبيب.بعدني وياك
جنح واغصان تتعلعل
وبعد الشوفتك عازة
النهر والماي والناعور
كلمن يعرف اعزازة
نذر لو تعتنيني بطيف
 لمشي الجدمك اجنازة
وافرع كل هلا معزبين
وافرع كل غنة السبعين
وافرع كل عتب برابين
وافرع كل دفو معرسين
واعطشك ..واغرك بمايك
وافز والكانة عين بعين
وافز والكانة طين بطين
واسألك انت اجيت منين
يانزوة واهس العشرين
خل نمشي اعلة ديرتنة
واشوفك بيت اهلنة الطين
 قديم وجنة غيرتنة
واشوفك مالكة شاطينا
وأشر اهناك جنة ازغار
 تزاعلنا وتراضينا
وأشر اهناك اخذنا الطيش
تواعدنا وتحاجينا
وأشر اهناك اخذنا الشوك
 بمسامر ليالينا
وأشر اهناك اخذنا الشيب
 تندما اعلة ماضينا
واعتك بيدي وازهك بيك
واندم واعتذر منك
وابوسك واعتذر منك
واجيبك نعتذر مني
واسألك ياضوة النجمات
شيكالفك لو تسامحني
وأسالك ياضوة مرايات
 شتخسر لو تسامحني
دخيلك خل نسامحني
هذا الشفتة واني احلم
وشنو التفسير؟ انت اعلم