حسين الجابري
تعذب بحبك واذبل من الشوك
وامر نسمه وتمر كدامي هبة ريح
بين جفوف طفله مدللة مسجون
تلعب ماتحس بدموعي من اتطيح
المشاعر تنكسر بس ماتطلع صوت
الخرسه اتعيش سكته وكلشي بيهه ايصيح
خرسه وبيهه معنه اشكبره هزت الراس
يهز راسه السعف لمن يضربه الريح
ردت بس فرصه منك كبل لا تندار
شكو حجايات حلوه كبالك احجيهه
اسمعني دقايق جرب اشخسران
بلكت كلمه منهن تقتنع بيهه.
عوف الكاع باوعلي ولو لحظات
ملامح وجهك الحلوات ناسيهه
عيونك منهن اعرف بس جفن وارموش
لحد الان ماحافظ معانيهه
ممحاجيني بس اسوالفك بالراس
السانات الخلك جابتلي طاريهه
وجهك ماتثكله اعله اليبوك اسنين
ملاك وتبقه تضحك حته لو زعلان
ملاك ولون وجهك ثابت اعله الخير
تقل اشويه من تحقد تصير انسان
وانه معاشر بشر واحدهم ايسم جيل
بأقل موقف بوجهه يبين الدخان
مابي باب كلبي ادخلتي مدري امنين
انه الكلبي ابد ماطبب النسوان
ماشاهك نفس لبنيه صار اسنين
ترى راسي وطن ميطبه ياهو الجان
يالتخجلين اذا صوت اعله ضلچ طاح
انه اشكتلج وخدج كام ينطي الوان
تعاي وخل ارش عمري اعله عمرج ماي
حرام الورد بخدودج يضل ذبلان
عيب اتصيحلج بسمج لهسه الناس
البعمرج ترى ايصيحولهه ام افلان
