رزاق الركابي

دوّت امناشغ بغيج من الرعيد
ارياح صف صف عاتيات وبيها عي
وعتنيتك والهوى ابردني رفيف
اتسرفنت طلعت زلم من جوه ادي
من اختنگ خشمي اطگ رية غشيم
طگه ذاك الصوب تسمع منها صي
اركاض شردة يوسف امن ازليخه اجيك
صفحة الگاع امن اطرها اطويها طي
انا الف راسي وادخن ما انام
ولا تعيّر شان خيط اخبال بي
ضولك الليل الشمع وابراسه خيط
بيك مدغوش العگل والشور لي
عود ردت احرگ هلك طلعو بخور
ضي جدح بالليل واكسر ليه في
شگد مجوس يموت عالنار الفَراش
يحترگ ويگلي تالي الدوه الكي
گلب نخله ولو ترشني بماي اموت
وجهي حنطاوي الخبز طالع علي
السوط شصي وجلد الماي من اصيد
واطلع الغرگان بالسناره حي
عالعثگ ارمي فشگ لو تمره اريد
اگنص المتكاثره واعفي الشوي
هيه گد افلوسك الخوه تصير
وساعة اتمغط يطگ ضلع من اخي
فشل زفه وتيّـهو بيت العروس
والتطوفك لا تسل ﭼــانت يهي ؟
گلبي ابيض بس سواد شويه بيه
خوش طالب عيب ما لبسنه زي
مغلمش اتكَمكَشهن ادري امعكمشات
دام شوفي ابـﭽفي بالظلمة شعلي
ذام طيب الهور داسه البلم دوس
ايطعنه بالمردي ويمشيه اعله مي
طاح سوك الخيل من صبّوها زاد
من ﭽـهب خطار حاتم عرب طي
عفه الگص روس السنابل بالحصاد
غاسل اجدام الزرع موسم الري
الشجرة بالغابه اتونس من تضيع
تشوف اهلها من الاعجيز للصبي
و من يضيع الجامع يصيحونه وين
بديره خيرهم يصيح لأمه هي
دام ما دامك بعيد تظل عزيز
لن جريب و ماطرب شاعر الحي
لعبة الطرشة بتراﭽـيها تصير
ريت اذنها و لنها تسمع منها شي
تلـﭽمه المرايه الاخوه التوم مات
ضنه شايف بيها اخوه المات حي
جومت المراية وجهه وصار اخوه
بصورة گابلها و يگـل لروحه خي