صفاء الجبوري

بعد لسه سواليفك يندهني
و بعد بيه سمــــار هواي
منك رمشي متحني
و اجة الصيف و روازيني شتة و همزين
سلف بردان ( من ذني )
و عثر صوتي وجه مكتول
عثرة تبين بلونة
يسألوني بفرگتك زين؟
اگلهم طينتي شلونه؟
و اگللهم افضحوني !
شوكت ما جايكم مهدود اسألو بحالتي شلوني؟
ما فاضحني دمع العين
لا هو المتن نگـــــط
و اعذره الشافني من بعيد
ينشد ” ياهو ذاك الشـــط ؟! “
الرسايل مو طويله بال
الحچي مالتهن اتشخط
رد وياي باگتنا السنين بفاس
تتذكر گبل چنا ..
نلتم لمة البستان و تعاين علينا الناس
ما تحسدنا بس هواي تاخذ غيبه الجنه !
رد وياي دليني الخضار منين؟
الوحك وين ؟ و اتبلل نده چفوفك !
كون تصير (اشم صبير سچه ريل اليشوفك) !
و احط دولاب اضم نسمات
كلها مداعبه زلوفك
و مو مكتوب لا كراس
ادعي هواي اصير تراب يم رفك
ما حاسدهم العرفوك !
لا .. ( هنيال رمشه الحاول يعرفك ) !
عساني ابير يخنگ سري و ظنوني
عساني (بدنية مرايات) تكتل لوعة عيوني
ذنب دربي السحگته هواي
ما رد للجدم عازه
ادورك بي و ارد متعوب
و يشاورني الدرب (تلگاه) يحط بچفي عكازه !
و اضم روحي بعشر حيطان
يصيحولي (الگبر مريود )
يا حايط غطة جنازه ؟!
روح استر خيالك طاح..
و اني زرار فوگ ردان مالوحه !
اني انسان ميت و (البقا لله)
و جروحه
عشت تمثال گد الحال بس احلامي (مرجوحه) !
انسة جروحي مفتوحات تكتل جاري الملوحه !
و انت هناك ونس روحك بنسيان
و اني الهم يونسني
الوحك وين؟
يالماخذني مو وياك لا .. مني