علــي طالـــب

سوالف متيهين ضحكات بغناي
و عود جنت الضحكه اجيهه بمشتهاي
راي ما عنده النكل جدمه اعله بير
و ذوق ما عنده اليباوع عالوراي
لا تسولف عالوطن يم الاسير
ولا تون يم راعي ضايع منه ناي
وخاف عبالك ضوه وهزني الظلام
انا كمره ويترس الهندس ضواي
يركض جويريد وانه براسي نار
و الغشيم يريد يتفرهد غطاي
باب المعاتب صياح من الصديج
مثل باب الاخره جفوفه بدناي
البرد بعيون الشمس نفخت رماد
هيج حالي من اذكر سوالف صباي
منين ما شيله العشك يرخه ويطيح
منين ماصد للحجي يصير بكفاي
منين ماصد للخلك الكاهه طين
منين ماصد للحجي يسوونه ماي
مثل ما رزت الباب انطيهه ايد
انطي ايدي الايدي واتعاون وياي
عالسراب تكاود جفوف الحصاد
جافه سنين الحصد منجلهه جاي
كشختي بعرسي اذا يضحك ابوي
وربعي من تلتم متن غيم بسماي
همه ضنوا بيه شيطان الرجيم
وانا تخجل بت سلف من مستحاي
رادو يعدموني بس شافوني خيط
موس جابو والفتك ما عنده راي.