اثيــر غانـــم
يانسيم الماتمر اله بربيع
صعب حالي وابد ما يحمل صبر
خلص عمري ومابقى من عنده شي
وهي جم يوم ويجي موسم كبر
من اشتعل ما تمر من اخمد تفوت
وانته تدري بحالتي مثل الجمر
يانسيم الوهمتني وصدكيت
اتلثم الوردات واتكلي ستر
وكتلي اسجنك والسجن رية فراش
واعتبرني مطلعك بأقرب عطر
لابس اكلادة ندى وناعم بحيث
ادغدغ ضلوع الشمس ينزل وفر
حيرتني اتفوت ملهوف اعلى كيف
اتكلي رايح مدري رايح تنتظر
واكفه براسك تريد وماتريد
وواكفه براسي عمود من الجمر
صفي نيتك مو تصفي الذكريات
عندي بيهن سالفه اتبجي وتسر
نايم ابحضنك جنت ليل ونهار
جنت احبك مدري بجناحي كسر
يالتبجيني جنت واضحك اجيك
ضحكك الهستوه جاي من الأسر
جان ما مكسور كلبي وهسه خير
بين كل كسرين تلكالك كسر
امشابك وزحمة وفه وعندي فراغ
شلون حالي وهسه عايش بل هجر
من كثر ماودعت خلص كفاك
انت مر بسوالفك بس ماتمر
شغير اطباعك قبل تحسبهه زين
وكل عشر زعلات تتبعد شبر
هسه شبرك طال بي حلقه زواج
وصاير بكل لحظه تتبعد عمر
يادرب زفتك درب كلش طويل
حال وركه بماي وبمد وجزر
جانت اعيوني الك هسه وراك
الروحه ما هضمتني هضماني العذر
يانسيم الشامك كوه ومحال
النسيم الزين ما ينشم جبر
ما ضمنتك من جنت غالي عليك
شلون اضمنك وانه هسه بلا سعر
جنت اريدنك كبل بس هسه لا
هسه اريدان عزتي وذاك الكدر
لاتباوعلي بزغر انه جبير
ومن اغربل بيتنه يوكع قصر
