عبد الوهاب الحمداني
الليل وعيون الحبيبة بفرد صينية
أو نجمة اتسيّر …
أو ما تلگى ابروحي ولا چلمة
أو گلبي الجوعان
يريد ياكل من ضحكتچ
وانتي ما تدرين !
ما تدرين يا دنيا
ما تدرين
كل شبّاچ يتثاوب
أو يفتحلچ قميص الضوه
يلگى ابنص ضمير الگمر قصة حب
وجرح نايم من زمان
ونثية ماخذها البرد والحزن
والدين امعلّگها بين ولايتين
أو يلگى الطيف الما بيه
ريحة حبيبته ايطيح من العين
أو يلگى إبن آدم من يسافر
يعشگ موته
أو يلبس خشبة تابوته
أو يكشخ بثياب الدفّان …
أو يلگى الدنيا الما تشرب سم إبليس
وتخبط ماي الضحكة
وتشگگ قمصان القصيدة
ما تگدر تبني الإنسان …
يا حبيبة گلبي
الينزع وجهه يم باب الحانة أو يدخل
يلگى ابوجه النثية الترگص چم مراية …
بيها ايشوف جروحه
أو عذابات الولاية
أو وجهه الثاني
أو گلبه الثاني
أو ربّه الثاني …
هاي الدنيا …
حانة ، أو راقصة ،
أو وجه كل ساع تنزعه
أو تلبس غيره …
