محمد خشين
صالحلي الحبل وي ركبة المعدوم
وافرض تكدر..وياك أرد ما مجبور
المغيسل كلب سويته للعدلين
الدمع موش اعله مودك عوزت كافور
طاريك وجع بس احجي بيك عناد
يتثلم حجي وما يسكت الطبشور
من يبجي الشمع ما يسكت اله يموت
وانه بيك وبدونك مكبل اعله كبور
سرح بس جان شعرك من جنت وياي
اطلعت من عشرتك ضلع بضلع مظفور
مشيت ابلا جدم والعشك عثرة روح
تعنيت لخضارك واطلعت مهجور
وصلت لمرحله مابيه حيل ارتاح
وادور عالخلل والكاك مامعذور
عساك بحيرتي خليت روحي بحال!
فصليه وتحب وانزفت لمخمور
النجم والبـ السجن هيهات يتلاكون
سكف بين الثنين ولا درب للنور
نوعين البشر لو شوك لو قداح
صح شكلك سمح بس داخلك بي جور
كلبك لو وجه جا ضاع بيه الليل
يل انطيتك شبابي وماكلت مشكور
العشك نجمه وكمر وثنين ملهوفين
واحدهم براحت بالهم مغمور
انه من عين باجر راح اطيح ادموع
لأن مو الأول انته الكلبي بي مغدور
كبل جيتك حركتي مصاحبتني سنين
الاجو كبلك جووني ودمي ظل يفور
فبالك لا يظل وتكول خاف يموت
عله حروره وجمر متعلم التنور
ولو أدري بضميرك ناس متعافين
يضحكون اعله حالي وحايطي المفطور
أمن أفصل حزني ساعه يصير عاشورين
العلم عند الله عمري يصير جم عاشور
شعجب ماتدري من العاشكك شيريد
ايترجه العافيه اليتعنه للدكتور
مو واهس جبتلك واهسين وياي
طاحن يم برودت طبعك المغرور
عطر من سولفت عالورد ماشميت
لأن أعرف شغل تفكيرك الشاجور
