كاظم غيلان
ياسميري المالي من بعدك سمير
اشلون ترضه امعذبه اتبات الظنون
ويا أمير، المالي من بعدك أمير
اتلالي، وحدك قافيه
وكلك جنون
انته صافي.. وتخبط ابماي العذاب
ومن أشربك
يشتعل بيه الوطن مثل العيون
برتقاله ابكترك.. ووصلة حرير
واسئله ابروحي عله اليمته يجون
خانوا العذال ماعدهم ضمير
وانفردنه اثنين هم تقبل نخون؟؟
انته تارسني عشك.. كلك صفير
وصوفرت بينه ليالي (المارقون)
انته أحله وأطيب ايدلي الضرير
والضرير آنه أصبحت من السنون
ياسميري.. المالي من بعدك سمير
انزل ابهيده على كلبي الحنون
واصعد لرآسي أغاني وخل أطير
وخل أشوف أحبابي كد ما بالعيون
ماني لجلك
عفت كل جامع ودير
وهاي أجمل أمنيه وعندك تهون
مرني يم سيكان حلوه وخل اصير
مثل صاعود النخل .. حيله المتون
ومن أطيح ابكل خصر ركصه اصير
ورجفه مجنونه تنسيني الديون
علكت قمصانهه الروح الحرير
ونته تمطر بالغنه وكلك فنون
مددت عشكي اعله أرطب سرير
والمخده اتندت ابماي العيون
ياسميري.. وصار بينه المايصير
ونته اطيب واعذب الكان .. ويكون
فارع الطول الذي ابحبك أسير
بيك يتغزل غزل حد الجنون
فارش اهمومه ابحضرتك يا أمير
ونته ويا للصبح تتغازلون
الكلب مالوم لن ماظل ضمير
عوني اعله اليجري مالياش عون
(برجوازي) الليل…
وآنه أطيب فقير
يشتريك امن العصر جي ما تخون
