احمد هيثم

افكار مثل الناس بيه

ناس راحت

ناس روح

وناس بيهم طيبة امي .. و وجه ابوي

والغريبة

التناقض بين ناسي

فكرة تاخذني لحلم .. بأوربا اعيش

وفكرة تاخذني لمنبه

باجر الخمسة الفجر .. باب الله افتحه

عيني توصل للخيال

وجفي ما يوصل لجيبي

وارجع اصفن

شنو رايد

وشنو عندي

وشلون أجذّب .. حتى اعيش

بيه حيرة تعادل التاركله سر .. بلسان جاهل

خلگي كاهل..

اني وين؟

واني ما اشبه هذاك الراسمينه

حتى اهلي

حتى قصتي

حتى اسمي .. هذا هم الجايبينه

اني وين ..

ومنو اني ..

وشنو يعني احيا واموت؟

اني وين و وجهي يستغربني .. من يلزم مراية؟

ومن اريد احجي بصراحة .. يكضني صوت

صوت ابويه .. صوت جامع .. 

المهم .. لازم اعيش

والاهم لازم اصدكَ بالسمعته

وما اناقش بالعقل .. هذا حرام

وما افكر بالسبب ..

وما ادور عالخلقني ..

بس ازور

المهم لازم ازور

وادعي حيـــل

ومن يسالوني اعله ديني … 

لازم محضر رشاشة

ولازم اقنعهم بقوتي

وشويه اخوفهم بصوتي

انــــــــي وين؟

مرة استغرب كلامي..

ومرة استغرب وجودي

ومرة .. احاول انسى .. وين

اني وين .. وكلشي ما مقتنع بي

وكلشي ما مقتنع بيه

وكلشي مثلي ..

خايف احجي .. خايف يفهموني صح

خايف يطلعوني كافر

وهم ميعرفون اصلا .. ياهو بينه الكَلبه كافر

انــــــي وين ..

 كلش براسي تدك

المسألة يمكن تلاهي

او وقت

او جذب .. مدري صدك ….