علي جعفر الكربلائي
بوية شنهي الصار كلي
والزمن غاضب علينة
بوية ليش الدنيا سودة
ومانعرف اشصار بينة
بوية بس الحزن عدنة
والفرح ماظن يجينة
بوية كل الناس تضحك
واحنة ماعفنة بجينة
بوية هم ننسى المآسي
وحتة نفرح لو نسينة
بوية المن بعد نحجي
ومحد يسمعة حجينة
بوية دنيتنة متاهة
ودرب واضح مالكينة
بوية والله الدنيا تغدر
لاتظنهة اصير امينة
بوية من تمطر نعاني
والكصب يوكع علينة
بوية أذتنة الصريفة
شوكت نسكن بالمدينة
بوية والله الجوع كافر
واحنة فقرة شلون بينة
بوية والله الجوع يكتل
والفقير الله يعينة
بوية من يوصل محرم
نبقة نفرح مو بدينة
لان نشبع بالمواكب
والحسين يمر علينة
احنة مانحوي مبالغ
بس كرامة احنة حوينة
واحنة مابعنة المبادئ
واحنة ماباكت ادينة
احنة ما نخضع نكابر
احنة بس لله نحنينة
احنة صح فقرة يصاحب
بس اهل غيرة بقينة
احنة صح فقرة ولكن
كل فقير احنة نعينة
