علي الجبوري – النجف الاشرف
مايحتاج افرع مستحاي گبال شماتي
ومايحتاج اداوي جروح طيني السولفتهن بيك
والمامش صبح بستان…
وصبح رمان طولك وي حلات الليل من يخدر
يعنگود الهلا الرايج…
معاضد بلخصر ومتاني بسلالي.
بگفاك شچم ظفيرة شوف
بي هزت خصر خدرت حتى الريح
چم ناي الرجع گصبات چيفن سولفت طاريك
ياواهس شلب والماي عبرة حيل….
تعال هنا….
وشالة ماي تسرج فشلة الناعور غطيني بشحيحك كيف
النجم يحفر گبر لو غازلت ليلك
يسالفتي…
ارد اوشل طينتي بروحك
يفي نخلة رطب وانه بشحيح فياي
يسوالف گبل مامش ظهر للخيل تچيني بفجر حيلك
ينوماس السلف ليش النهر جافي وماتصل جرفه
ليش المو هوه من يهيج ماتوگف تسد ريتك
وتمر ريتك
(ارى وجهك في وجوه الناس
كنظرات يعقوب للحياة وهو يرى يوسف في كل زاويه
واكملت عجزي لكن لايوجد نبي يرويني الصبى
أمسيت راكضا)
وافرفح لوجزاني الريل وتبده على سچة وين تعال براسي الك موگد
اشوف الناس موش وجوه مقتنعه بسفر مجبور اهومش مستحه اعلى الريل
وامد چفين……
وادعيله بسچچ فرن عگل ناطور ردنه لبداية سير…
اكظ بصورتك كظة عمه لطارف سراب الخيط واعزفلك لحن خدر ونين الناي
يمته ترد…يحضن العافيه الرايج
انه مناطر
حدر ظل الصريفه البيهه رجفة سيل
