حسن رحم – ناصرية
ضكت طعم العشگ لو عرس لو تابوت
شما تكبر بعيني الصوره اغطيها
الراسملك حضن بي دفو ملاگه سنين
ليش النعمه بيدك تجي وتجفيها
حلو عشگ الزغار كل ماكبر ينهاب
مثل اول رساله ومستعز بيها
لاتطعني من امشي بدرب متعوب
كون تصير ماي وشفتي ترويها
رماي وشرط بالگصه من اختاظ
ما نيشنت مره وخاب سرگيها
اعزب بل هلا حته ويا ملك الموت
ماسولف عليه وانه راعيها
الروج شما عله ياخذ نفس وياه
النار تموت اذا جف هوه يلاكيها
بي عزت نفس حته من ادوسن كاع
التارك جدمه اثر فشله انه مشيها
احذرك من تمر لا تسحگ عله الروح
بيه جروح طابت وانه ناسيها
جنت بس انته تمسح دمعتي من ختاض
فشله كبال شامت دمعتي ابچيها
مدري جابني ويم بابكم مريت
اي مجبور لاكن مستحي احجيها
الغيم يدنگ ويسگي الزرع مرات
اذا شاف الفلح ماتت مساحيها
ياهواس حلم شمتاني اخذني الشيب
بيه ضنون ماتت ورد اوعيها
انا بهجرك مثل فلاح زارع نباك
كباله وشاف غيره الگام يحويها
شمتاني بعد گطرت حيه مابيك
بانت عشرتك وانكشف تاليها
من اصفن اطلع بيك ميت عيب
واندل التلچمك واعرف شبيها
الگاع شما علت ياكل وجهه الماي
السواجي المالحه تغير معانيها
تره اليكشخ بهيبه السانه ال يحلي
اكو بيهم زفر تنگط خواچيها
خذت طبع النهر ما رجعت عطشان
واليدفن سراره بروحي اخليها
