مصطفى العقابي – ميسان
وكافي اتوضا بخضارك وانته يابس .
ولاتنسم علهلاهل
بعدك صغير عليهن وانته مو كد المحابس .
كوم واخنك روحك وعيش ضميرك.
ذاك انته بلايه صوت
وذاك انه الجاي اموت
وذيج ديرتنه الجنت منعدهه افوت .
حجي المغرب راح يخلص
لاتاذن
هاي ديرتنه شياطين وسكاره
وخايف يصلون بيك
وانه خايف من اديهم
وانه اخاف من الصحو بروحك
يطكه اللون الازرك من حجيهم
وانه اخاف حرورتك تصعد عليك وتشتهيهم
وانا اخاف الحنه لاتيبس ع ايدك
بيش اغسلك
ماي البروحي الشمس باكت حلاته
والعشك عايف صلاته
ليش ماوصيته بينه
انه خايف من جهنم تحظه بينه .
وانا اخاف الروج يعلى
والتهي بشمرت جفوفي
ومايجي ابالي حجينه.
وانا خايف من ضميرك
ماوكف وكفت شراع بوجه روجات السفينه.
انا اخاف من الهوى الغرك السفينه
وانا اخاف من العرس ليفك ادينه
الملامح بيه كبرت
وبيه ينشاف الضباب .
استغربتني مرايتي
وعود انه شاب .
مو اكلك
بعدك صغير عليهن
جنتاجيك براسي موعد
وانته تلعب بلتراب
