سامي عبد المنعم

ياشعبي گوم إنتفض ..

ضد الحراميّة

سوّيها ثورة غضب

وإكنس الهتليه

معقولة صرنا غنم ..؟

واليحكمونا زلم

باگوا أموالك نهب

وإيواعدونك چذب

بأحلام ورديّة

ذولّه عگارب صفر

بس على هيئة بشر

لبسوا لحايا نصب

وإنتشروا إبكل حزب

بأفكار بعثية

كيّفنا طاح الصنم ..

إنوب إجانا الحوت

واللي إيحب الوطن

ينتهي إبكاتم صوت

إتحملنه جوع وقهر

وإصبرنا حد الموت

رد إلنه حزب البعث

يسرق أموال الشعب

شايلّه سبحة يسر..

والگصّة مچويّة

محبس عقيق وشذر

وساكن بأحسن قصر

والناس بس تنتظر

والدنيا مسبية

من تحچي ضيم الشعب

إيحسبونك إرهابي

ويتصورونك غبي ..

من تسكت إعله الظلم

حصتك من النفط ..

صارت بواچي ولطم

كروش الحكومة علت

وصلت الحد الخشم

واولادك إتذبحوا..

كل يوم عدنا فلم

معقولة أن ننتظر

داعش إتطب بغداد..؟

إنغلس على اللي جره

ونتغنه بالامجاد

ياشعبي گوم إنتفض

خل تنتهي المهزلة

كافي خنوع وصبر

وتمسكن أو بهذلة

ليوين تبقه كمش

وبآخر القافلة

إيمشوك حافي الجدم

إمن البصرة إلى كربله

وهمه إبمواكب حرس

هيبة ورباعي الدفع

إنهض إكنسهم كنس

وإشلع جذرهم شلع

ثورات چانت إلك ..

مذكورة بالتاريخ

زمجر إبثورة غضب

وخلي الحرامي إيليخ