زيد الهلالي
يفيض الماي خليني عله رموشك ولو مرود
يكحله برمش الحديثات صليني عله وجه الماي وتمدد
وغطيني بهذاك الليل من ابرد
وشعلني صواني شموع لوشح الضوه المريود اضويلك
ولو جاسك ظلام الگيظ ضوه مبلل اصليلك
واريد بخمرة عيونك اتيه كل حزن بيه واندهك كيف
الكمر لو غازلاه الليل يطيح بزلفه ترجيه
واتناوشك جف فانوس يم هندس بواهس طيش
وابلل روحي من نهدك وارد هايم وكول فيش
واسافر بيك كذلة ماي وتدليني عله ذنوبي
عطشانه السوالف بيك وانه مبلل سولفلي يمحبوبي
وازرعلك سوالف تين لومريت بدروبي
واحصدلك طرب سبعين بيهن ياس لوغنه البنفسج يذبل ويسكر
يل بجيدك غفه النعناع لاتنغر
يل زندك گطن خدران يتبختر
ولك يسمر
دز خدك يسير للنده مرايه
وخل ثغرك يضوي الليل لوطاف الظلام دروب الولايه
يعافيتي الك حنيت وديلي هواك الدافي العذيبي
اريد بزلفك اتمرجح ودلل طفلة گليبي
اريد بجفك اركد حنه مذبوحه بعوافي شموس عصريه
ولاتطلع بعد يفلان اريد الناس ماتلكاك بس بيه
يسالفتي السهر لوتاه يتوجه عله گمريه
يسالفتي النهر يتناك يگوم بطوله لو لاگاك
يركض عل گناطرفيض
ويعبر مشاحيفه عله راس الگيظ لوشم خيط من طرواك
يسالفتي تعال وشوف كاروك النده يتناك
يبن التين اريدن فوگ من شفاك اركد شامه نعسانه
اريدن وي صباح لله الف روحي عليك حجول بردانه
وخليني عله كل محراب اطيح بحضرتك قرآن
وضمني لمنحرك ايه ارتلك نغم جبريل وي ربه
يسالفتي الك حنيت مثل كل الحمام العايش بغربه
