زين العابدين – بغداد
ياشيخ لا تعقد بعد ذمة بهاي
مغصوبة هاي التعقدلهه ابقران
حنتهه تابوت البخت من ينشال
زفتهه ثالث شيخ مابيه اخوان
الفزة عثرت طيف مو عثرت عين
والحلقة عثرت نعش خطبة ونيشان
فاتح خلگ مو گبر لرايح جاي
صينية العريس حطو نيشان
شميتهه وشميت روحي وشميت
گلبي اليتيم وحرگه وسط ادخان
مثل ادلال اني انحنيت وحسيت
هزات چفهه ابوچهي هزت فنجان
رفضوني
رفضت ذاك هوه اللي يگول
مرت الابو سدت عليه البيبان
رفضتني امهه ادرب هم اطرش چان
يضحك علي ظل ارصيف ابتربان
وافقو ليش استعجلو والمسجون
حط اسوالف كلهه يم اسجان
فشلت گصب لبسيت يم وادم ناي
والهور للعشاگ يعني اديوان
يافشلت ام اوليد تركض عالماي
نص ادرب گلولهه ابنچ غرگان
امنيتي اكلچ ام ولكن اميش
ام بيتي لو مبروك صرتي ام افلان
گالولي جاهل عندچ وعمره احلام
يشبه ضحكتي المرت اعله الخرسان
گهوة انتي بيد شيوخ صرتي ابلا راي
صح مرة بس مرغوبة وسط اديوان
بيچ انه اشوفن غيري لمن صديت
صديتلچ صدت امراية العميان
هيبت اتاجر سلعة لو طب ابسوگ
بس فشله ايعيرونه لو طب خسران
رديت ردت باب شيخ ابلا ضيف
سرگية دنگ راسة كلش خجلان
يافرحة امي الماتعدت حلقات
نص ديني اكمله ابيش وانتي اويه افلان
