احمد السعد / من البصرة
اعلة كيفك بالهجر حسب وراك انسان
شماله الطير ينكر وكفة الشجرة
ماواصل سمه شسواك غيم وداع
موحتة المطر من يبتدي بكطرة
ترة اليكطع ورد يكتل فراش هواي
وانة شلون اقتنع باليكطع العشرة
عشت دور اليوافي وتضحك بلياي
ولاچني اعلمودك واهسي مطشرة
المفارك صدك ليرجفة صوت الباب
لو واحد يدكة تفز الف ذكرة
البروحة غصن يكره كلام الفاس
وانة كلبي ورق بس واكحت جمرة
اجرن بالنفس لو شهكة لو دخان
ولاذلة نسيمك جي يجي بحسرة
ابيض من وجنتك بيه لون الراس
خذت عمرين مني وماخذت عبرة
ضكت طعم الليالي وفرزنت الايام
وعرفت الحرامي يضوج بالكمرة
ومتت من القهر لمن شفت فزاع
موش اعداه خنجر صاحبه بظهرة
يبسني العطش بس خضرت وكفات
واجر طول النهر لو تنتخي الصحرة
خلصت العمر كل ونه اشهك ناي
الماضايك عشك ماينحسب عمرة
مرة الكهوة لكن ثكلت الفنجان
تهز جف الشربها وتفتهم عذرة
يالشارب ضحكتي بكاس متعافين
ترة الحرمة العليك تعادل الخمرة
انة اتناسة واكولن من زمن ناسيك
وارد اسمك اذكرة باول السهرة
وما اذكر ملامح بس وجه مكفاك
واكولن مارحل متوهمة النظرة
غريب الليل بعدك موش لول ذاك
بعدني اول جكارة ويطلع بفجرة
يوسف للحلم جانت تجيه الناس
ماعاش بزماني وحلمك يفسرة
رجعت منك بدية الحيرة والوهواس
مثل ام وتحط وليدها بحفرة
