غزوان العبادي
تعاتبني يجرف الرازقي السكران
ياريحان
ياطير اليميز الناس عن فزاعة البستان
تزعلني وتراضيني
تزعلني واغيض وياك وازعل زعلك اعله الروح
وتراضيهم واراضيهم وانه اعله الناس ما راضي
والم حزن البروحي ودمعي الناس بايكته
اوالم فرح البروحي وضحكي الناس بايكته
انه بحزني وانه بفرحي دمعتي تصب
ناكع مانشف جفني بارد مثل ثوب الحب
الك بيه غنه السبعين جم موال الك بيه وتعده شتاك
ماريع دفو بصوتي واغنيلك
ضكني بجلمة اعتابك مدام الكاس بجفوفي
ومدام من الكمر اصحه روحي اتسوالف البيهه
شما ضك السمه الزركه ضلام الله تلولحله تراجيهه
افزن بالعطش شلوه واشوف الناس بجروفك
وارد عشطان انه ورحي وسواجيهه
شيصحيني جفن نعسان وطيوفك بلا موعد تفززني
يبرحي البروح يمعود يبرد الروح يمعود ياشمس بسماري تفوح
دليني اعله مايك ذاك روجك ذاك حدر ياصخره ضل غافي
طش مايك حدر روحي بجزيره ينشل شراعي
بجزيره الخوف يشتلني ويفزلي اثنين ؟
يفز ذيب ! ويفز بابك !
من روحك ولو خيال خل يشتاكلي ويرجع
الك جم مهره احسهه اطارد بعيني
يابير الشرب وجهك يامغرب ذبح شمسك
دم شمسك نذر حنه روازيني !!
وين الكله اليلهيني اعله ريحانك . اليلهيني اعله نعناعك
بليل الناس اشوفن تحرث بكاعك ! ورحي بعبشة الله وتهت بكاعك
روحي بياكتر ظلت ادور وين وانشد وين شعليهه الناس وانشدهه ؟
شبجة صيد منسيه عله جروف العطش روحي
غبشه ومدري يابلام ماخذهه
لاتعتب وتتعجب عله اليدور !! حار ارغيف اهلنه وبارد التنور
لا تعتب عله اليدور
عليه روحك اريد ادور عليه عينك اريد ادور
اشتلت وجهي عله الشباج وامتانك ريح ادور
بلكي ادور
