للشاعر المرحوم كاظم خبط

يمه ذوله اهل القصر ما لاعبوني

يمه من شافوني اجيت تنادسوا واستغربوني

يمه ماسموني باسمي

وكالو هذا ابن الفقير وشتموني

وكالو هذا ابن الصريفه وعيروني

يمه جا هو الفقير اشسوه من نجله ابعمرهم ؟

يمه جا هيه الصريفه شماخذه وخايف قصرهم

يمه كالوا لاتمر منا بعد بالك تشم ريحة وردنه

وكالو بجدمك الحافي نخاف يترب عكَدنه

يمه عدهم كلشي عدهم واحنه بس الماكو عدنه ..

يمه لعابات عدهم مدري شنهي , وانه لعاباتي طين

, يمه حته ثيابهم مستغربتني يعاتبن ثوبي الحزين

, يمه جا ليش احنه فقره وليش اهلهم زناكَين

يمــــــه دين الفقره متعب خل نبدله بغير ديــــــن..

وليش ماعدنه قصر عالي مثلهم ؟

موش ابونه اليبني هاي قصورهم كل هالسنين

وليش ماعدنه ورد يمه مثلهم؟

موش ابونه اليزرعلهم بساتين؟

يمه مو كتيلي مره . ابنادم اطباعه تهم مايهم لونه ..

ويمه مو كَتيلي مرة .

يمه ثاري بس الكَمر بالدنيه يحبنه

اعلينه يسهر دوم ماغمض اعيونه

يمه خاف الكَمر هم ينباع والهم يشترونه .؟

يمه امس مر بينه فارس

خضرن دمعاتنه بروحه سوالف

لونه لون وجوهنه ويشكي مثله

يمه والعباس جنه من الصرايف

سولفنه شكثر سولف كلهن سوالف جديده

يمه كَال الحكَه بيد الغير جا شيسوي بيده

يمه كَال السكك كثرة . الفرح بالسكة البعيده